Åtvarar kompisen før returen: – Må «preppe» dei

– Det er ei veldig sterk gruppe med veldig gode lag, så det blir utruleg gøy og ei stor utfordring å gå inn i dei kampane, seier Kjetil Knutsen til Discovery om Conference League-trekninga til Bodø/Glimt.

I gruppespelet møter Glimt belgiske Club Brügge, tyrkiske Besiktas og sveitsiske Lugano. Den første kampen er borte mot Lugano 21. september.

Også Patrick Berg seier seg einig i at gruppa er sterk.

– Det er noko av det tøffaste vi kunne fått, men det er berre artig. Det kjem til å vere veldig mange morosame og utfordrande kampar utover hausten, seier han til Discovery.

– Kunne de ønske at det ikkje vart ei like tøff gruppe?

– Det kjem an på korleis ein ser på det. Med tanke på å gå vidare frå gruppa, kunne vi sjølvsagt ønska å møte nokre dårlegare lag, men eg synest det berre er artig, seier Berg og held fram:

– Då får ein sett kvar nivået på dei europeiske laga ligg. Vi ønsker å utvikle oss heile vegen, så det er ikkje noko betre for oss enn å møte gode lag.

I Club Brügge speler dei tidlegare Glimt-spelarane Hugo Vetlesen og Philip Zinckernagel. Knutsen legg ikkje skjul på at det blir hyggeleg med eit gjensyn med dei.

– Vetlesen og Philip er to gutar som har hatt ei flott reise i Glimt. Vi er ekstremt glad i dei, og føler at vi har vore med på vegen.

Den tidlegare trenaren er stolt over spelarane si utvikling.

– Vi er utruleg glade for at dei har kome seg ut i den store verda, men det blir utruleg kjekt å sjå dei igjen, seier Knutsen.

Berg ser også fram mot eit møte med dei tidlegare lagkameratane.

– Eg prata med Vetlesen då trekninga blei klar, så eg trur nok han gler seg.

Til Discovery fortel Vetlesen at han gler seg til å kome tilbake på Aspmyra.

– Det blir veldig gøy å reise tilbake til Bodø og godt å sjå folka igjen. Eg har spesielle band og mange gode vener der, så det blir gøy.

I førekant av trekninga skjønte Vetlesen at Club Brügge kom til å trekke Glimt.

– Det var skrive i stein at vi skulle møte dei og trekke dei i gruppespelet. Det hadde eg snakka med Kjetil om i førekant også, så eg var førebudd på det.

Fleire av laga som Bodø møter, er nok vant til høgare temperaturar enn det det er i nord, spesielt på denne tida av året. Det har Berg merka.

– Eg har opplevd tidlegare at europeiske lag kjem til kalde Bodø, og ikkje er heilt førebudd på kva som møter dei.

For Club Brügge vil det kanskje vere ein fordel å ha spelarar i troppen som kan førebu lagkameratane på kva som ventar dei i Bodø.

– No har dei jo nokon som har vore med på det sjølv, så dei får ta på seg den oppgåva med å «preppe» dei.

Det ansvaret har Vetlesen allereie tatt på seg.

– Det blir ikkje enkelt på Aspmyra, så eg skal preppe gutane godt inn mot den kampen, seier han.